BMG-niň Bütindünýä meteorologiýa guramasynyň hünärmenleri dünýäde iň uzyn ýyldyrymy hasaba aldy. Ol 2017-nji ýylyň 22-nji oktýabrynda ABŞ-nyň asmanynda çakdy we Gündogar Tehasdan Kanzas-Siti töwereklerine uzady diýip, Space.com ýazýar.
Ýyldyrymyň uzynlygy 829 kilometr boldy (plýus-minus 8 km ýalňyşlyk bilen). Bu bäş ýyl ozal hasaba alnan öňki rekorddan 61 km uzyndyr.
Ýyldyryma hemra maglumatlarynyň ilkinji seljermesinde üns berilmedi we diňe gaýtadan barlananda ýüze çykaryldy. Meteorologiýa guramasy onuň uzynlygyny Pariž bilen Wenesiýanyň arasyndaky aralyk bilen deňeşdirdi.
Meteorologlaryň maglumatlaryna görä, şeýle uzyn ýyldyrym Demirgazyk Amerikanyň Beýik düzlükleri üçin mahsus bolan güýçli tupan zolaklarynyň birinde dörän bolmaly. Ýyldyrym NOAA GOES-16 geostasionar hemrasy tarapyndan ýazga alyndy.
Bütindünýä meteorologiýa guramasy bu rekordyň tebigatyň “haýran galdyryjy güýjüni” görkezýändigini belledi. Şeýle hadysalara baha bermek adatdan daşary howa şertlerine ylmy gözegçilikde uly üstünlikleriň gazanylandygyny delillendirýär.
