Londonyň “Tottenhem” futbol klubunyň hem-de Günorta Koreýanyň milli ýygyndysynyň hüjümçisi Son Hyn Min iňlis toparyndan gidýändigini mälim etdi. Klubuň kapitany tomusky transfer döwründe topar bilen hoşlaşar diýip, Sky Sports habar berýär.
Futbolçynyň aýtmagyna görä, ol özüni täze synaglara taýýar hasaplaýar. Son 2015-nji ýyldan bäri London toparynda çykyş edýärdi.
"Maňa üýtgeşmeler gerek. 10 ýyl — bu uzak döwür. Demirgazyk Londona 23 ýaşly ýaş oglan bolup geldim, hatda iňlisçe gürläp hem bilemokdym. Indi bolsa bu kluby uly buýsanç bilen terk edýärin. Bu ýerden meniň aňymda ajaýyp ýatlamalar galdy" — diýip, ol metbugat ýygnagynda aýtdy.
“Tottenhemiň” janköýerlerine aýratyn sagbolsun aýdýaryn. Meni şeýle uly söýgi bilen gurşap alandyklary üçin minnetdar. Bu meniň durmuşymdaky iň kyn kararlaryň biri boldy, ýöne onuň wagtynyň ýetendigine ynanýaryn. Umuman, hemmeler maňa dogry düşüner diýip umyt edýärin" — diýip, Son Hyn Min belledi.
Geçen möwsümde koreýaly hüjümçi topary bilen ilkinji kubogyny — Ýewropa ligasyny gazandy. Umuman, ol “Tottenhem” bilen 454 oýna gatnaşyp, 173 gol geçirdi. Ol klubuň taryhynda iň köp gol geçiren futbolçylaryň sanawynda dördünji orunda durýar.
2021/22 möwsüminde Son Hyn Min bilen “Liwerpulyň” hüjümçisi Muhammet Salah Angliýanyň Premýer-ligasynyň iň gowy bombardiri diýen ada mynasyp bolupdylar. Olar 23 gol bilen bu ady paýlaşdylar.
Günorta Koreýanyň milli ýygyndysynda Son Hyn Min 134 duşuşykda 51 gol geçirdi.
Köpçülikleýin habar beriş serişdeleri onuň karýerasyny ABŞ-nyň MLS ligasynda — “Los-Anjelesiň” düzüminde dowam etdirjekdigini aýdýarlar.
