Barselonanyň sebit kazyýeti «Barselona» futbol klubunyň prezidenti Žoan Laporta garşy «Core Store» we «CSSB Limited» kompaniýalarynyň taslamalaryna maýa goýumlary bilen baglanyşykly galplyk aýyplamalary boýunça gozgalan işi ýapdy. Bu barada «Mundo Deportivo» neşiri habar berýär.
Şikaýat arzasyny 2016-njy ýylda taslamalara 100 müň ýewro maýa goýan ozalky tennisçi Albert Ramos beripdi. Taslama şowsuz bolandan soň, ol maýa goýum töwekgelçilikleri we kärhanalaryň maliýe ýagdaýy barada ýalňyş ýola gönükdirilendigini mälim etdi.
Kazy, Laportanyň, klubuň wise-prezidenti Rafa Ýusteniň we ozalky direktor Hawýer Sala-i-Martiniň atlarynyň maýadarlary çekmek üçin ulanylandygyna subutnamalaryň ýokdugyny belläp, arzany bereniň delillerini ret etdi. Kararda taslamanyň hakykatdan hem bardygy, Ramosyň bolsa iki ýylyň dowamynda diwidend alyp durandygy bellenýär.
Kazynyň pikirine görä, kynçylyklar garaşylmadyk ýagdaýlar, ýagny «Reus Deportiu» klubunyň 2019-njy ýylda Professional futbol ligasyndan çykarylmagy we koronawirus pandemiýasynyň täsirleri sebäpli ýüze çykypdyr. Şeýle hem kazy maýadaryň taslamanyň ýagdaýy we tölegleriň gijikmeginiň sebäpleri barada maglumat bilen üpjün edilendigini görkezdi.
«Mundo Deportivo-nyň» maglumatlaryna görä, Ramosyň arzasyna garan kararyň şoňa meňzeş beýleki iki işiň garalyşyna täsir etmegi mümkin.
