Hindistanyň häkimiýetleri 22-nji noýabrdan koronawirus pandemiýasy sebäpli girizilen daşary ýurtlular üçin giriş talaplarynyň aglabasyny ýatyrdylar, indi olara uçuşdan öň sanjym maglumatlary bilen anketany doldurmak hökman däl diýip, Times of India portaly habar berýär. Muny interfax.ru ýetirýär.
“Öň Hindistana gatnaw üçin hasaba alyşda syýahatçylar ýörite Air Suvidha anketasyny dolduryp, onda kowide garşy alnan sanjymlar barada maglumatlary görkezmelidi. Diňe şeýle şert bilen olar uçara münüp bilýärdiler. Bu Hindistana ugraýan daşary ýurtlularda nägilelik döretdi. 22-nji noýabryň ýarygijesinden başlap anketany doldurmak hökmany däl” – diýip, neşir ýazýar.
“Koronawirus bilen keselleme hadysasynyň azalmagy, tutuş dünýä boýunça, şol sanda Hindistanda sanjymlaryň işjeň alnyp barylmagy bilen baglylykda koronawirusa garşy çäklendirmeler gowşadyldy” - diýip, portal belleýär.
Geçen hepde häkimiýetler içerki we halkara gatnawlarda hökmany örtük dakynmak düzgünini ýatyrdylar. Indi syýahatçylara munuň üçin jerime salynmaz.
Rugsat berlen içerki we halkara uçuşlaryň sanyna çäklendirmeler hem ýatyryldy. Şol bir wagtyň özünde Saglygy goraýyş ministrligi Hindistana gelýän adamlaryň ählisine öz ýurtlarynda tassyklanan sanjym tertibine laýyklykda sanjym almagy maslahat berýär. Şeýle-de, Hindistana uçuş wagty örtük dakynmak maslahaty hem saklanýar. Uçuş wagty koronawirus alamaty bolan islendik ýolagçy izolýasiýa edilip bilner. Mundan başga-da, ýolagçylaryň uçardan düşmegi distansiýa talaplaryny berjaý etmek bilen amala aşyrylmaly.
