Türkmenistanyň daşary işler ministri Raşid Meredow penşenbe güni Germaniýanyň iki sany kompaniýasynyň — işewür ulgamda korporatiw maliýelere ýöriteleşen Goetzpartners Corporate Finance we döwlet ulgamynyň edaralary üçin dolandyryş we maslahat meseleleri bilen meşgullanýan Prodoehl Consult kompaniýalarynyň ýolbaşçylaryny kabul etdi.
«Duşuşykda Türkmenistan bilen Germaniýanyň arasynda söwda we ykdysady hyzmatdaşlyk meseleleriniň giň toplumy ara alnyp maslahatlaşyldy. Şeýle hem dürli geljegi uly taslamalar we maýa goýum hyzmatdaşlygy barada pikir alyşdy» - diýlip, türkmen daşary syýasat edarasynyň saýtynda habar berilýär.
Bellenilişi ýaly, nemes işewür wekiliýetiniň Türkmenistan Hökümetinde birnäçe duşuşyklary geçirilmegi meýilleşdirilýär.
