Türkmenistanyň Milli Geňeşiň Halk Maslahatynyň Başlygy Gurbanguly Berdimuhamedow 12-nji noýabrda Mary welaýatyna iş saparyny amala aşyryp, welaýatyň kärendeçi daýhanlarynyň öndürijilikli zähmetiniň üpjün edilmegi ugrunda döredilýän mümkinçilikler bilen tanyşdy.
Hususan-da, saparynyň barşynda Gurbanguly Berdimuhamedow welaýatyň Mary etrabynyň «Milli goşun» daýhan birleşiginiň pagtaçy-kärendeçisi Döwletgeldi Rejebowyň hem-de «Zarpçy» daýhan birleşiginiň gallaçy-kärendeçisi Muhammetmyrat Ýaşarowyň kärende ýerine baryp, olar bilen gürrüňdeş boldy.
Kärendeçi daýhan D.Rejebow on iki ýyldan bäri daýhançylyk bilen meşgullanýandygyny we kärende ýerinde gowaça, bugdaý we beýleki oba hojalyk ekinlerini ösdürip ýetişdirýändigini, şeýle hem häzirki güne çenli 12 gektar kärende ýerinden 12 tonna pagta hasylyny döwlete tabşyrandygyny, ýene-de bu ýerden 15 tonna hasyl almagy meýilleşdirýändigini gürrüň berdi.
Gallaçy-kärendeçi Muhammetmyrat Ýaşarow özüniň 4 gektar kärende ýerinde bugdaý ösdürip ýetişdirýändigini, şu günler ak ekinlere ösüş suwuny tutmak we mineral dökünler bilen iýmitlendirmek işleriniň agrotehniki kada laýyklykda alnyp barylýandygy barada gürrüň berdi. Şeýle hem ol özüniň 22 ýyl bäri daýhançylyk bilen meşgullanýandygyny, bir oglunyň we bir gyzynyň bardygyny, mellek ýerinde gök ekinleri we miweli baglary ösdürip ýetişdirýändigini gürrüň berdi.
Milli Geňeşiň Halk Maslahatynyň Başlygy daýhanlary Hasyl toýy bilen gutlap, olara Türkmenistanyň Prezidentiniň adyndan toý sowgatlaryny gowşurdy.
Şeýle hem Gurbanguly Berdimuhamedow kärendeçi daýhanlaryň haýyşy boýunça olar bilen ýadygärlik surata düşdi.
