Türkmenistanyň Milli Geňeşiniň Halk Maslahatynyň wekiliýetiniň Russiýa Federasiýasyna resmi saparynyň çäklerinde iki ýurduň parlamentleriniň ýokarky palatalarynyň başlyklarynyň orunbasarlary K.Babaýewiň we K.Kosaçýowyň duşuşygy geçirildi. Duşuşygyň gün tertibine iki ýurduň kanunçylyk edaralarynyň arasyndaky hyzmatdaşlygyň häzirki ýagdaýy hem-de geljegi baradaky meseleler girizildi.
Türkmenistanyň Milli Geňeşiniň Halk Maslahatynyň we Mejlisiniň komitetleriniň ýolbaşçylarynyň gatnaşan duşuşygynyň dowamynda häzirki döwürde türkmen-rus parlamentara gatnaşyklarynyň işjeň, yzygiderli we netijeli häsiýete eýe bolýandygy nygtaldy. Bellenilişi ýaly, munuň şeýledigine 1-nji noýabrda gol çekilen Türkmenistanyň Milli Geňeşiniň Halk Maslahatynyň we Russiýa Federasiýasynyň Federal Ýygnagynyň Federasiýa Geňeşiniň arasynda hyzmatdaşlyk etmek boýunça Parlamentara toparyny döretmek hakynda Ylalaşyk şaýatlyk edýär.
Wekiliýetleriň agzalary hyzmatdaşlygy berkitmek üçin giň mümkinçilikleriň bardygyny belläp, iş alyp barmagyň täze görnüşlerini işläp düzmek barada pikir alyşdylar. Şunuň bilen baglylykda, iki ýurduň parlamentarileriniň bilelikdäki mejlisleriniň geçirilmegine gyzyklanma bildirip, wekiliýetleriň agzalary birnäçe guramaçylyk meselelerini ara alyp maslahatlaşdylar.
Türkmenistanyň hem-de Russiýanyň döwlet we hökümet Baştutanlary tarapyndan gazanylan ylalaşyklary iş ýüzünde durmuşa geçirmegiň gurallary hem garalan meseleleriň biri boldy. Kanunçykaryjylyk işi babatda gatnaşyklary giňeltmegiň ýollarynyň işlenilip taýýarlanylmagyna aýratyn üns berildi.
