Türkmenistanly hünärmen Mergen Orazow Litwanyň “Dainawa” futbol toparynyň baş tälimçisi wezipesine bellenildi. Bu barada toparyň metbugat gullugy habar berdi.
Ýewropa klubuna geçmegi tälimçiniň karýera ösüşinde täze tapgyr boldy. M.Orazowyň öňünde duran esasy wezipe — toparyň milli çempionatdaky ýagdaýyny gowulandyrmak. Geçen möwsümde Ýewropa kuboklaryna gatnaşmaga dalaş eden “Dainawa” häzirki wagtda ýaramaz ýagdaýda — 16 tapgyrdan soň diňe 4 utuk bilen soňky orunda ýerleşýär. Möwsümiň soňuna çenli 11 duşuşyk galdy we litwaly klub bu duşuşyklarda ýagdaýy gowulandyrmaga umyt baglaýar.
Mergen Orazow — ozalky futzalçy, tälimçilik karýerasyna “Altyn Asyr” klubunda kömekçi hökmünde başlapdy. Soňra bolsa “Köpetdag” we “Ahal” toparlaryna ýolbaşçylyk etdi. Onuň ýolbaşçylygynda “Ahal” Türkmenistanyň çempiony boldy, şeýle hem ýurduň Kubogyny we Superkubogyny gazandy. 2023-nji ýylda ol Türkmenistanyň milli ýygyndysynyň baş tälimçisi wezipesine bellendi. Şeýle hem M.Orazow Ispaniýanyň “Willareal” akademiýasynda we Portugaliýanyň milli ýygyndysynda tejribelik geçdi.
M.Orazowyň “UEFA Pro” ygtyýarnamasy bolup, onuň milli ýygyndy we professional toparlarda 5 ýyllyk iş tejribesi bardyr.
