Şu gün, 4-nji oktýabrda Türkmenistanyň Milli Geňeşiň Halk Maslahatynyň Başlygy Gurbanguly Berdimuhamedow Hytaýyň döwlet köpçülikleýin habar beriş serişdeleriniň haýyşy boýunça Hytaý Halk Respublikasynyň Türkmenistandaky ilçihanasynyň metbugat-attaşesi Wan Sziunyň sowallaryna jogap berdi. Söhbetdeşlik «Watan» habarlar gepleşiginiň agşamky sanynda görkezildi.
Söhbetdeşligiň barşynda hytaý-türkmen gatnaşyklarynyň ösüşi, energetika, ulag we beýleki pudaklarda ikitaraplaýyn hyzmatdaşlygyň häzirki ýagdaýy we mümkinçilikleri, Gurbanguly Berdimuhamedowyň Hytaýyň Kommunistik partiýasynyň konsepsiýalaryna, Si Szinpiniň döwleti dolandyrmakda gazanan üstünliklerine berýän bahasy, Hytaýyň Kommunistik partiýasynyň geljekki ösüşi babatda garaşýan netijeleri barada gürrüň edildi.
Öň habar berşimiz ýaly, Hytaýyň «Ženmin Žibao» gazeti Türkmenistanyň Milli Geňeşiniň Halk Maslahatynyň Başlygynyň makalasyny sahypalarynda çap etdi.
TmCars.info söhbetdeşligiň sowallaryny we olara berlen jogaby aýry-aýry materiallarda okyjylaryň dykgatyna ýetirer.
