17-nji awgustda Türkmenistanyň BMG-niň ýanyndaky hemişelik wekilhanasynda Türkmenistanyň BMG-niň ýanyndaky hemişelik wekili A.Ataýewanyň ABŞ-nyň BMG-niň ýanyndaky hemişelik wekili Linda Tomas-Grinfild bilen duşuşygy geçirildi. Bu barada TDIM-niň Metbugat gullugy habar berýär.
Nygtalyşy ýaly, duşuşygyň dowamynda BMG-niň Baş Assambleýasynyň öňümizdäki 77-nji sessiýasy hem-de iki ýurduň BMG-de ileri tutýan ugurlary we BMG-däki özgertmeler bilen bagly meseleler boýunça netijeli pikir alşyldy.
Türkmenistanyň ilçisi söhbetdeşligiň başynda BMG-niň Baş Assambleýasynyň «Merkezi Aziýa — parahatçylyk, ynanyşmak we hyzmatdaşlyk zolagy» atly Kararnamasyny goldandygy üçin amerikan tarapyna minnetdarlyk bildirdi we onuň kabul edilmeginiň netijeleri boýunça ABŞ-nyň wekiliniň oňyn çykyş edendigini aýratyn belledi. A.Ataýewa Türkmenistanyň BMG-niň Baş Assambleýasynyň 77-nji sessiýasyndaky ileri tutýan ugurlary barada jikme-jik aýtmak bilen, parahatçylyk we howpsuzlyk, durnukly ösüş, zenan parlament agzalary, öňüni alyş diplomatiýasy we ulag ugurlaryndaky başlangyçlaryny beýan etdi.
Duşuşygyň barşynda BMG-däki, hususan-da Howpsuzlyk geňeşindäki özgertmeler boýunça pikir alşyldy. Taraplar BMG-niň Howpsuzlyk Geňeşiniň işinde açyklygyň zerurdygy hem-de aýratyn amallaryň gaýtalanmazlygy üçin BMG-niň düzümleriniň özgerdilmegi pikirlerinde ylalaşdylar.
