Dünýäniň iň gymmat brendleriniň we iň meşhur gözlegçileriň biri bolan Google howa ýollarynyň peteklerini bronlamak bölümini ýapýandygy barada habar berdi. Myhmanhanalary bronlamak bölümi bolsa mundan ir ýapyldy. Munuň sebäbi kowid bilen bagly meseleler bolman, adalatsyz bäsdeşlik üçin şikaýatlar we jerimelerdir. Bu barada tourprom.ru belleýär.
Hususan-da, soňky habar şu ýylyň oktýabr aýynda Google-yň syýahatçylyk bölüminiň Germaniýada ýapylýandygy boldy. Şondan soň ol kem-kemden tutuş dünýäde amala aşyrylar, doly ýapylyş 2023-nji ýylyň mart aýyna meýilleşdirilýär. Şol bir wagtyň özünde, myhmanhanalary bronlamak bölüminiň şu ýylyň maý aýynda ýapylandygy habar berilýär.
Bularyň sebäbi myhmanhanalardan şikaýatlaryň gelmegi we netijede, pudagy düzgünleşdirijiler tarapyndan jerimeleriň salynmagy bilen baglanyşyklydyr. ÝB-de Google-yň myhmanhanalary bronlamak tejribesiniň “adalatsyz bäsdeşligi döredýändigi” aýdylyp, onuň üçin birnäçe gezek kazyýete ýüz tutuldy. Netijede, Google-a ençeme gezek uly mukdarda jerime salyndy.
Ýeri gelende bellesek, iň gymmat brendleriň reýtinginde ikinji orunda Google ýedi ýyl – 2013-nji ýyldan 2019-njy ýyl aralygynda saklandy. Häzirki wagtda ol Microsoft bilen Amazon-y öz öňüne geçirip, dördünji orna düşdi. Birinji orun barada aýdylanda, Interbrand agentliginiň wersiýasyna görä, ony “Makdonalds” eýeleýär.
