Amerikaly telekeçi Ilon Mask Twitter-i satyn almak baradaky şertnamanyň eger kompaniýa sosial ulgamdaky akkauntlaryň hakykylygynyň nähili ýol bilen tassyklanýandygyny görkezse, dikeldilip bilinjekdigini aýtdy. Bu barada TASS habar berýär.
“Eger Twitter 100 akkaunty saýlap almagyň usuly barada gürrüň berse we olaryň hakykylygynyň nähili tassyklanýandygyny görkezse, onda şertnama başlangyç şertlerde amala aşyrylar” – diýip, ol Twitter-de ýazdy. Öň, Mask sosial ulgamda 100 sany tötänleýin saýlanan akkauntlaryň hakykylygyny barlajakdygyny aýdypdy.
Ýatlap geçsek, iýul aýynyň başynda Maskyň hukukçylary Twitter kompaniýasyna kompaniýanyň şertnama tarapyndan göz öňünde tutulan birnäçe borçlary ýerine ýetirmändigi, şol sanda galp akkauntlaryň we köpçülikleýin ýaýratmak üçin ulanylýan hasabat ýazgylarynyň paýy barada doly maglumat bermändigi sebäpli telekeçiniň sosial ulgamy satyn almakdan ýüz öwürýändigi barada duýdurdylar. 12-nji iýulda Twitter kompaniýasy kazyýete ýüz tutdy.
Delawer ştatynyň kazyýeti telekeçiniň Twitter-i satyn almak baradaky şertnamany tamamlamakdan ýüz öwürmegi bilen bagly işe garamagyny oktýabr aýyna belledi. 29-njy iýulda Ilon Mask hem kompaniýa garşy arza berdi.
