Tesla kompaniýasynyň çap eden tizerinde Optimus diýip atlandyrylan robot-gumanoidiň elleri şekillendirilipdir. Onuň resmi taýdan ilkinji görkezilişi 30-njy sentýabrda geçer diýip, Electrek ýazýar.
Häzirlikçe roboty diňe tizerde görkezdiler. Ondan çen tutsaň, Teslanyň bu döredeni adampisint keşpli, onuň elleri bolsa adamyňka mahsus hereketleri ýerine ýetirer derejede diýseň çeýe we çalasyn bolar.
Gumanoid 2023-nji ýylda hatara goşulyp biler. Ilon Mask bu ugur öz kompaniýasy üçin awtoulagdanam wajyp bolar diýip hasaplaýar. Şeýle robotlaryň adaty adamlaryň we senagatyň durmuşyny sözüň doly manysynda çepbe çöwürjegine ol mäkäm ynanýar.
Tanyşdyrylyş ikinji "Emeli aňyň gününiň" çäklerinde geçer. Birinjisini Tesla laýyk bir ýyl mundan öň geçiripdi. Başda, ikinjini hem awgustda geçirmegi meýilleşdiripdiler, ýöne çärä Optimusy taýýarlap ýetişer ýaly, bir ýarym aý aňry süýşürdiler.
