Özbegistanyň Syýahatçylyk we medeni miras ministrligi Milli PR-merkezi bilen bilelikde şu ýylyň 30-njy noýabryndan 2-nji dekabry aralygynda 27-nji Daşkent halkara syýahatçylyk ýarmarkasyny geçirer. Bu barada ministrligiň metbugat gullugyna salgylanyp, centralasia.media habar berýär.
Bellenilişi ýaly, her ýyl ýarmarka programmasynyň çäklerinde konferensiýalar, B2B duşuşyklary, tegelek stollar, syýahatçylyk hyzmatlarynyň sergileri, Özbegistanyň sebitleriniň syýahatçylyk potensialynyň tanyşdyrylyşy, gastronomiki we beýleki çäreler geçirilýär.
2019-njy ýyldaky Daşkent halkara syýahatçylyk ýarmarkasynda 15 müňden gowrak gepleşik geçirilip, 9 müňden gowrak hyzmatdaşlyk şertnamasyna gol çekildi. Bu ýarmarkanyň taryhynda 23 müňden gowrak myhman gatnaşan iň uly wakadyr.
Daşkent halkara syýahatçylyk ýarmarkasy “Ýüpek ýolundaky syýahatçylyk” 1995-nji ýyldan bäri BMG-niň Bütindünýä syýahatçylyk guramasynyň resmi goldawy bilen geçirilýär. Her ýyl sergi dünýäniň dürli künjeginden syýahatçylyk biznesiniň hünärmenlerini ýygnaýar.
