Prezident Serdar Berdimuhamedow Türkmenistanyň Ministrler Kabinetiniň düzüminde howpsuzlyk, harby we hukuk meseleleri boýunça wise-premýer wezipesini ýatyrdy. Bu barada Döwlet Baştutany şu gün geçirilen Türkmenistanyň Döwlet Howpsuzlyk geňeşiniň mejlisinde habar berdi. Mejlisiň barşynda harby we hukuk goraýjy edaralaryň ýolbaşçy düzümi tassyklanyldy.
Hökümetiň düzüminden harby-hukuk goraýjy edaralar boýunça wise-premýer wezipesiniň aýrylmagy bilen baglylykda, bu wezipedäki Çarymyrat Amanow başga işe geçmegi sebäpli Döwlet Howpsuzlyk geňeşiniň sekretary wezipesinden boşadyldy.
Serdar Berdimuhamedow döwlet howpsuzlygyny we goragyny berkitmekde, kanunçylygy we hukuk tertibini üpjün etmekde Ç.Amanowa minnetdarlyk bildirdi hem-de ýurduň we halkyň öňünde bitiren hyzmatlaryna ýokary baha berdi.
Serdar Berdimuhamedowyň karary bilen Türkmenistanyň Howpsuzlyk geňeşiniň sekretary wezipesine goranmak ministri Begenç Gündogdyýew bellenildi.
