15-nji martda Prezident Gurbanguly Berdimuhamedow bilen Ermenistan Respublikasynyň Premýer-ministri Nikol Paşinýanyň arasynda telefon arkaly söhbetdeşlik boldy. Dostlukly döwletiň Hökümetiniň ýolbaşçysy türkmen Liderini Prezident saýlawlarynyň üstünlikli geçirilmegi bilen tüýs ýürekden gutlady.
Prezident Gurbanguly Berdimuhamedow Nikol Paşinýana gutlaglary üçin minnetdarlyk bildirip, merkezi saýlaw toparynyň saýlawlaryň jemleri boýunça Serdar Berdimuhamedowy Türkmenistanyň täze saýlanan Prezidenti diýip yglan edendigini habar berdi we mundan beýläk özüniň Türkmenistanyň Milli Geňeşiniň Halk Maslahatynyň Başlygy wezipesinde işini dowam etdirjekdigini aýtdy.
Telefon söhbetdeşliginiň dowamynda ozal gazanylan ylalaşyklary durmuşa geçirmek hem-de bar bolan mümkinçilikleri dürli pudaklarda hyzmatdaşlygy geljekde hem ösdürmek üçin doly herekete getirmek bilen baglanyşykly ikitaraplaýyn gatnaşyklaryň ileri tutulýan meseleleri ara alnyp maslahatlaşyldy.
Ermenistan Respublikasynyň Premýer-ministri Serdar Berdimuhamedowy ýokary döwlet wezipesine saýlanmagy bilen tüýs ýürekden gutlap, oňa berk jan saglyk hem-de ýurduň we halkyň bähbidine alyp barjak asylly işlerinde uly üstünlikleri arzuw etdi.
