28-nji fewralda Lebap welaýat häkimliginiň mejlisler zalynda günüň ikinji ýarymynda bu ýerde Mary welaýatyndan raýatlaryň teklipçi topary tarapyndan iň ýokary döwlet wezipesine dalaşgärlige hödürlenen Türkmenistanyň Döwlet energetika institutynyň “Gaýtadan dikeldilýän energiýa çeşmeleri” ylmy-önümçilik merkeziniň direktory Kakageldi Saryýew bilen saýlawçylaryň duşuşygy boldy.
Dalaşgäriň ynanylan wekili — Döwlet energetika institutynyň energetika pudagynyň ykdysadyýeti kafedrasynyň müdiriniň wezipesini ýerine ýetiriji D.Agajanow ýygnananlary K.Saryýewiň zähmet ýoly bilen tanyşdyrdy hem-de onuň ýokary hünär derejesini, guramaçylyk ukyplaryny, hormata mynasyp şahsy häsiýetlerini belledi.
Soňra Türkmenistanyň Prezidenti wezipesine dalaşgär duşuşyga gatnaşyjylaryň öňünde çykyş edip, saýlawlaryň öň ýanyndaky maksatnamasynyň esasy ugurlaryny beýan etdi. Dalaşgäriň aýdyşy ýaly, halk hojalygynyň ähli pudaklarynyň, şol sanda energetika ulgamynyň önümçilik kuwwatlyklaryny yzygiderli artdyrmak üçin toplumlaýyn çäreleri amala aşyrmak, önümçilige sanly tehnologiýalary, ylmyň iň soňky gazananlaryny we dünýä tejribesini ornaşdyrmak saýlawlaryň öň ýanyndaky maksatnamasynyň esasy ugurlarynyň hataryndadyr.
