Ermenistanda häkimiýet başynda duran, ýurduň häzirki premýer-ministri Nikol Paşinýanyň «Raýat şertnamasy» partiýasy parlament saýlawlarynda sesleriň 49,81 göterimini gazandy. «News.am» agentliginiň habar bermegine görä, bu maglumatlary Ýurt boýunça jemi 2005 sany saýlaw uçastogyndan gelen býulletenleri doly hasaplandan soň Merkezi saýlaw komissiýasy mälim etdi.
Russiýaly milliarder Samwel Karapetýanyň «Güýçli Ermenistan» bileleşigi sesleriň 23,29 göterimini almagy başardy. Üçünji orunda bolsa 9,94 göterim ses bilen ýurduň öňki prezidenti Robert Koçarýanyň ýolbaşçylygyndaky «Ermenistan» blogy barýar.
«Gülläp ösýän Ermenistan» partiýasy bolsa sesleriň 4 göterimini eýeledi.
Şunlukda, deslapky maglumatlara görä, Täze parlamentde «Raýat şertnamasy» partiýasy 61 mandata, «Güýçli Ermenistan» alýansy 28 mandata, «Ermenistan» blogy 11 mandata, «Gülläp ösýän Ermenistan» partiýasy bolsa 4 mandata eýe bolar.
Ermenistanda parlament saýlawlary 7-nji iýunda geçirildi. Bu syýasy bäsleşikde jemi 18 sany syýasy güýç — 16 partiýa we iki sany alýans bäsleşdi. Saýlaw kanunçylygyna görä, partiýalar üçin parlamentden orun almak çägi 4 göterim edip bellenildi. Bloklar üçin (üç partiýa çenli birleşmeler) bu görkeziji 8 göterime, dört we ondan köp partiýanyň birleşmeleri üçin bolsa 10 göterime deňdir.
Saýlawlardan soňky gije çykyş eden Paşinýan Ermenistanyň Ýewropa Bileleşigi bilen ýakynlaşmak ugruny dowam etdirjekdigini, emma şol bir wagtyň özünde Ýewraziýa Ykdysady Bileleşiginiň düzüminde galjakdygyny mälim etdi. Şeýle-de ol: «Biz Russiýa Federasiýasy we Ýewraziýa Ykdysady Bileleşiginiň beýleki agza ýurtlary bilen gatnaşyklarymyzy has-da ösdüreris» diýip, aýdanlarynyň üstüni ýetirdi.
