Wýetnamyň premýer-ministri wezipesini ýurduň Kommunistik partiýasynyň Merkezi Komitetiniň sekretary we partiýanyň Merkezi guramaçylyk komitetiniň başlygy Le Min Hyng eýeledi. Ol 16-njy çagyrylyşyň Milli ýygnagynyň birinji sessiýasynyň dowamynda saýlandy. Bu barada Wýetnamyň VNA habarlar agentligi habar berýär.
Le Min Hyngyň dalaşgärligini Milli ýygnagyň 495 deputatynyň ählisi biragyzdan goldady. Ol ýurduň hökümetine geljek bäş ýylyň dowamynda — 2031-nji ýyla çenli ýolbaşçylyk eder.
«Watana, halka we Wýetnam Sosialistik Respublikasynyň Konstitusiýasyna doly wepaly bolmaga, Partiýa, Döwlet we halk tarapyndan ynanylan wezipeleri üstünlikli ýerine ýetirmek üçin ähli tagallalary etmäge kasam edýärin» – diýip, ol kasam kabul ediş dabarasynda aýtdy.
Täze premýer 1970-nji ýylda ýurduň merkezi böleginde ýerleşýän Hatin welaýatynyň Tymi diýen ýerinde dünýä indi. Hyngyň ýokary syýasy bilimi bolup, ol döwlet syýasaty boýunça magistr we fransuz dili boýunça bakalawrdyr.
Ol 2024-nji ýylyň maý aýyndan bäri Kompartiýanyň MK-synyň guramaçylyk bölüminiň müdiri wezipesinde işledi, ondan ozal KP MK-nyň kanselýariýasyna ýolbaşçylyk etdi we Wýetnamyň Döwlet bankynyň başlygy wezipesini eýeledi. Ol Merkezi banka 46 ýaşynda ýolbaşçylyk edip, bu edaranyň iň ýaş ýolbaşçysy bolupdy.
