23-nji fewralda Türkmenistanyň Türkiýe Respublikasyndaky ilçihanasy «Çalyk Holding» kompaniýasy we Malatýada ýerleşýän Inönü uniwersiteti bilen bilelikde Prezident Gurbanguly Berdimuhamedowyň «Ak şäherim Aşgabat» atly kitabynyň türk dilindäki neşiriniň tanyşdyrylyş dabarasyny geçirdi.
Oňa Malatýa welaýatynyň gubernatory, adybir şäheriň häkimi, «Çalyk Holding» kompaniýasynyň ýolbaşçysy, Inönü uniwersitetiniň rektory hem-de professor-mugallymlary, talyplar, jemgyýetçilik guramalarynyň ýolbaşçylary, türk kompaniýalarynyň, ýerli habar beriş serişdeleriniň wekilleri gatnaşdylar. Çärä Halkara ynsanperwer ylymlary we ösüş uniwersitetiniň mugallymlarydyr talyplary hem onlaýn usulda goşuldylar.
Dabara gatnaşyjylar, ilki bilen, türkmen Lideriniň kitaplarynyň, Türkmenistanyň ösüş-özgerişlerini şöhlelendirýän fotosuratlaryň hem-de milli gymmatlyklarymyzyň sergisine syn etdiler. Soňra 2022-nji ýylyň «Halkyň Arkadagly zamanasy» diýlip atlandyrylmagy mynasybetli ýurdumyzyň gazanan üstünlikleri, taryhy we medeniýeti bilen tanyşdyrýan wideoýazgylar görkezildi.
Tanyşdyrylyş dabarasynda Türkmenistanyň Türkiýedäki Adatdan daşary w Doly ygtyýarly ilçisi çykyş edip, «Ak şäherim Aşgabat» atly kitabyň hormatly Prezidentimiziň paýtagtymyzyň esaslandyrylmagynyň 140 ýyllygy mynasybetli halkymyza hem-de dünýäniň giň okyjylar köpçüligine gymmatly sowgady bolandygyny aýtdy we onuň many-mazmuny barada giňişleýin gürrüň berdi. Malatýanyň gubernatory hem-de şäher häkimi, «Çalyk Holding» kompaniýasynyň ýolbaşçysy, Inönü uniwersitetiniň rektory öz çykyşlarynda ak mermerli Aşgabadyň waspyny ýetirýän bu kitabyň türk dilinde neşir edilmeginiň türkiýeli okyjylary türkmen paýtagtynyň şan-şöhraty we gözellikleri bilen ýakyndan tanyşdyrmakda uly ähmiýete eýedigini belläp, iki dostlukly ýurduň arasyndaky özara gatnaşyklarda ýetilen sepgitler barada pikir-garaýyşlaryny paýlaşdylar.
