27-nji ýanwarda Daşary işler ministrlikleriniň arasynda onlaýn görnüşde türkmen-rumyn geňeşmeleri geçirildi. Onda türkmen tarapyna Türkmenistanyň daşary işler ministriniň orunbasary Wepa Hajiýew, rumyn tarapyna bolsa Rumyniýanyň Daşary işler ministrliginiň Döwlet sekretary Danut Sebastian Nekulaesku ýolbaşçylyk etdi.
TDIM-niň Metbugat gullugynyň habar berşi ýaly, işjeň ýagdaýda geçirilen geňeşmeleriň dowamynda syýasy-diplomatik ulgamdaky meseleleriň giň toplumy ara alnyp maslahatlaşyldy. 2022-nji ýylyň 21-nji iýulynda iki ýurduň arasynda diplomatik gatnaşyklarynyň ýola goýulmagyna 30 ýyl dolýar. Şunuň bilen baglylykda ýokary derejede we daşary işler ministrleriniň derejesinde gutlag hatlary alyşmak, ikitaraplaýyn hyzmatdaşlyk barada makalalary we interwýulary çap etmek, onlaýn leksiýalary okamak, tegelek stollary we maslahatlary geçirmek ýaly birnäçe çäreleriň guralmagy teklip edilýär.
Şeýle-de söwda-ykdysady ulgamynda hyzmatdaşlyk etmek meseleleri, şol sanda Ykdysady we ylmy-tehniki hyzmatdaşlyk boýunça hökümetara toparyň nobatdaky mejlisini geçirmek meselesi dogrusynda hem pikir alşyldy.
