Ankara Owganystana 750 tonnalyk ynsanperwer ýük ýüklenen otly ugrady. Anadolu agentliginiň maglumatlaryna görä, owgan halkyna bu ynsanperwer kömek Tebigy betbagtçylyklaryň we adatdan daşary ýagdaýlaryň täsirlerini aradan aýyrmak boýunça Türk agentliginiň utgaşdyrmagynda 11 sany ynsanperwer gurama tarapyndan ugradylýar.
Otlyny ugradyş dabarasy Ankaradaky taryhy menzilde geçirildi. Dabara Türkiýäniň içeri işler, ulag we infrastruktura ministrleri gatnaşdylar. 47 wagondan ybarat bolan otly Türkmenistanyň üstünden üstaşyr geçer, ýol 16 güne çeker. Otly Owganystana çenli 4168 km ýol geçer.
Bu otly düzüminde ugradylan ynsanperwer ýüke azyk harytlary, ýyly egin-eşikler, ýapynjalar, arassaçylyk serişdeleri we beýlekiler girýär.
2021-nji ýylyň dekabrynda Türkmenistan hem goňşy Owganystana ynsanperwer kömeginiň nobatdaky tapgyryny iberdi. 1200 tonnalyk ýüküň düzümine dokma we azyk önümleri, şeýle hem nebit önümleri ýüklenen 20 sany demir ýol wagony bar.
