21-nji ýanwarda Aşgabatda “Türkmenistanyň Prezidenti Gurbanguly Berdimuhamedowyň halkara habar beriş serişdelerine beren interwýulary”, “Merkezi Aziýanyň döwlet Baştutanlarynyň konsultatiw duşuşygy” hem-de “Ykdysady Hyzmatdaşlyk Guramasynyň 15-nji sammiti” atly syýasy kitaplaryň neşir edilmegi mynasybetli ylmy-amaly maslahat geçirildi.
Foruma ylym we bilim ulgamlarynyň, jemgyýetçilik guramalarynyň, köpçülikleýin habar beriş serişdeleriniň wekilleri, ýokary okuw mekdepleriniň rektorlary hem-de mugallymlary, talyp ýaşlar gatnaşdylar. Oňa Türkmenistanda işleýän diplomatik wekilhanalaryň ýolbaşçylary hem çagyryldy.
Kitaplarda beýan edilýän wakalar Prezident Gurbanguly Berdimuhamedowyň oňyn täzeçillik syýasatyny aýdyňlygy bilen açyp görkezýär. Forumyň dowamynda medeni diplomatiýa — ählumumy parahatçylygyň kepili, Bitarap Türkmenistanyň parahatçylyk söýüjilik hem-de hoşniýetli goňşuçylyk syýasaty, onuň sebit we halkara hyzmatdaşlyga, Merkezi Aziýada ýakynlaşmak işine goşan düýpli goşandy ýaly mowzuklara bagyşlanan çykyşlar diňlenildi. Döwlet Baştutanynyň daşary ýurtlaryň köpçülikleýin habar beriş serişdelerine beren interwýularynda sebitde hem-de halkara giňişlikde parahatçylygy we howpsuzlygy goldamagyň, şunuň bilen baglylykda, Birleşen Milletler Guramasy hem-de beýleki abraýly düzümleriň çäklerinde hyzmatdaşlygyň ähmiýetiniň nygtalýandygy bellenildi.
Maslahata gatnaşyjylar neşir edilen täze kitaplaryň häzirki we geljekki nesiller üçin Watanymyzyň şanly taryhyny açyp görkezýän gymmatly miras boljakdygyny bellediler.
