19-njy ýanwarda Türkmenistanyň Prezidenti «Aşgabat-siti» iri ýaşaýyş toplumynyň gurluşygyna degişli meseleler bilen tanyşmak üçin paýtagtyň demirgazyk künjeginde bardy. Bu ýerde türkmen Lideri «Aşgabat-siti» toplumynyň desgalarynyň gurulmagy üçin seçilip alnan ýerleriň derejesini hem-de bu künjegiň tebigy aýratynlyklaryny synlady.
Prezident Berdimuhamedow Aşgabat şäherini abadanlaşdyrmak we ýokary ýaşaýyş derejesini üpjün etmek bilen bagly alnyp barylýan işler boýunça şäheriň gulluklarynyň ýolbaşçylarynyň hasabatlaryny diňledi, şeýle-de gurulmagy meýilleşdirilýän binalardyr inženerçilik desgalaryň taslamalary bilen tanşyp, «Aşgabat-siti» ýaşaýyş toplumynyň gurluşygyna taýýarlygyň çäklerinde alnyp barylýan işleriň depginleriniň pesdigine ünsi çekdi.
Bu ýerde işleri talabalaýyk guramakda haýal-ýagallyga ýol berilýändigi üçin Gurulýan desgalar direksiýasynyň işine nägilelik bildirip, döwlet Baştutany işleri degişli derejede ýola goýmagy berk talap etdi.
