Türkiýäniň Prezidentiniň administrasiýasynyň Jemgyýetçilik bilen aragatnaşyk edarasy daşary ýurt platformalarynda “Hello Turkiye” (“Salam, Türkiýe”) atly kampaniýa başlady, ol ýurduň adynyň hut şu görnüşini beýleki dillerde has netijeli ýöretmegi maksat edinýär. Bu barada TASS habar berdi.
Kampaniýanyň çäginde Türkiýäniň Prezidentiniň administrasiýasynyň Jemgyýetçilik bilen aragatnaşyk edarasy sosial ulgamlarda mahabat wideosyny ýerleşdirdi, onda Türkiýäniň dürli künjeklerinden daşary ýurtly syýahatçylar “Hello Turkiye” jümlesini ýatlamak bilen postlary paýlaşýarlar. Wideo #helloTurkiye heştegi bilen neşir edilýär.
Türkiýäniň Prezidentiniň administrasiýasynyň Jemgyýetçilik bilen aragatnaşyk edarasynyň ýolbaşçysy Fahrettin Altun “Turkiye” brendiniň ofisiniň dörediljekdigini we onuň “ýurduň imijiniň hem-de brendiň gymmatynyň ösmegine ýardam etjekdigini” habar berdi. Ofis hususy pudak we döwlet guramalary bilen hyzmatdaşlyk eder. “Biziň jemgyýetimiziň ähli gatlaklarynyň bu meselä ünsli bolmagy we kampaniýany goldamagy hökmandyr. Döwlet edaralarynyň, jemgyýetçilik guramalarynyň, akademiki bileleşigiň we metbugatyň öz gözleglerinde, hatlarynda we gatnaşýan çärelerinde biziň ýurdumyzy agzap geçenlerinde Turkiye sözüni ulanmagy gerek. Bilelikde işlemek bilen, biz Turkiye brendini tutuş dünýäde berkidip bileris” – diýip, ol belledi.
2021-nji ýylyň 4-nji dekabrynda Türkiýäniň prezidenti Taýyp Ärdogan buýruga gol çekdi, oňa laýyklykda “Made in Turkey” brendiniň deregine eksport önümleri diňe “Made in Turkiye” brendi bilen iberiler, şeýle-de respublikanyň ähli resmi resminamalarynda Turkey, Turkei, Turquie sözleriniň deregine ýazylyşyň diňe bir görnüşi – Turkiye ulanylar.
