«Türkmenhowaýollary» 14-nji ýanwarda Aşgabat — Stambul — Türkmenabat ugry boýunça ýörite uçuşy amala aşyrar. Bu barada Stambulyň Halkara howa menziliniň resmi saýtynda habar berilýär.
Howa menziliniň uçuş tertibinde anna gününe Т5 3901 belgili Aşgabat — Stambul uçuşy bellenildi. Uçuşlaryň tertibine laýyklykda, şol gün «Türkmenhowaýollary» Stambul — Türkmenabat ugry boýunça uçuşy ýerine ýetirer.
Dünýäde dowam edýän koronawirus pandemiýasy zerarly çäklendirmeler bilen baglylykda yzygiderli halkara howa gatnawlary dikeldilýänçä döwletleriň arasynda howa gatnawlary ýörite uçuşlar arkaly amala aşyrylýar.
«Türkmenhowaýollary» bilen birlikde, Türkmenistana ýörite uçuşlary Turkish Airlines we S7 rus awiakompaniýalary hem amala aşyrýar.
Ýakynda Turkish Airlines 2022-nji ýylda Türkmenistana eýýäm üçünji ýörite uçuşyny amala aşyrar. 14-nji ýanwarda bolsa, S7 awiakompaniýasy täze ýylda Türkmenistana ilkinji ýörite gatnawyny amala aşyrar.
