Şu ýylyň martyndan başlap, Türkmenistan Gazagystan Respublikasyna türkmen tebigy gazyny ibermäge taýýar. Bu barada onlaýn usulda geçirilen Türki Döwletleriň Guramasynyň daşary işler ministrleriniň adatdan daşary duşuşygynda Türkmenistanyň Ministrler Kabinetiniň Başlygynyň orunbasary, daşary işler ministri Raşid Meredow habar berdi.
Hususan-da, Türkmenistanyň Baş diplomaty ýurdumyzyň bu döwletdäki ýagdaýlaryň tiz wagtda kadalaşdyrylmagyna, Gazagystanyň durnukly jemgyýetçilik-syýasy we durmuş-ykdysady ösüşine uly gyzyklanma bildirýändigini aýratyn nygtap, şu ýylyň mart aýyndan başlap, Türkmenistanyň Gazagystana türkmen tebigy gazyny iberip başlamaga taýýardygyny mälim etdi. Şeýle hem ýurdumyzyň geljekde doganlyk Gazagystany zerur mukdarda elektrik energiýasy bilen üpjün etmäge taýýardygy barada aýdyldy.
Ýeri gelende bellesek, Gazagystana türkmen gazyny ibermek bilen bagly mesele ýurduň Prezidenti Kasym-Žomart Tokaýewiň geçen ýylyň 24-25-nji oktýabrynda Türkmenistana amala aşyran ilkinji döwlet saparynyň dowamynda türkmen Lideri bilen geçirilen ýokary derejeli duşuşykda gozgaldy. Şonda Prezident Kasym-Žomart Tokaýew Prezident Gurbanguly Berdimuhamedowa türkmen gazyny özara kabul ederlikli nyrhlar boýunça Gazagystanyň bazaryna ibermegiň mümkinçiligine garamak barada ýüzlenendigini habar berip, türkmen Lideriniň bu meseläniň çözülmegine maksatlaýyn, toplumlaýyn çemeleşmegiň möhümdigi baradaky pikirini doly goldaýandygyny nygtapdy.
