10-njy ýanwarda Türkmenistanyň daşary işler ministri Raşid Meredowyň Beýik Britaniýanyň we Demirgazyk Irlandiýanyň Birleşen Patyşalygynyň Türkmenistandaky täze bellenen ilçisi hanym Lýusia Waýld bilen duşuşygy geçirildi. Söhbetdeşlikde şu ýyl Türkmenistanyň we Beýik Britaniýanyň arasynda diplomatik gatnaşyklarynyň ýola goýulmagynyň şanly 30 ýyllygynyň bellenilýändigi nygtaldy.
TDIM-niň Metbugat gullugynyň habar berşi ýaly, söhbetdeşligiň dowamynda ministr R.Meredow Beýik Britaniýanyň ilçisini jogapkärli wezipä bellenmegi bilen gutlady we taraplar iki ýurduň arasynda gatnaşyklary berkitmegiň, şol sanda ikitaraplaýyn syýasy, söwda-ykdysady we medeni-ynsanperwer hyzmatdaşlygy ösdürmegiň meselelerini ara alyp maslahatlaşdylar.
Ilçi Lýusia Waýld Türkmenistanyň daşary işler ministrine özüniň ynanç hatlarynyň nusgasyny gowşuryp, iki ýurduň arasyndaky gatnaşyklaryň has-da giňeldilmegi we pugtalandyrylmagy üçin tagallalaryny gaýgyrmajakdygyny ynandyrdy.
