Wise-premýer Serdar Berdimuhamedowyň ýolbaşçylygyndaky Türkmenistanyň Hökümet wekiliýeti ykdysady ulgamda türkmen-özbek hyzmatdaşlygyny giňeltmek hakynda duşuşyklary we gepleşikleri geçirmek üçin ýakyn wagtda Özbegistanyň Daşkent şäherine iş saparyny amala aşyrar. Bu barada Türkmenistanyň DIM-niň metbugat gullugy habar berýär.
Bu barada Türkmenistanyň Daşary işler ministri R.Meredowyň özbek kärdeşi A.Kamilow bilen geçiren telefon arkaly söhbetdeşliginde bellenilip geçildi.
Iki döwletiň daşary syýasat edaralarynyň ýolbaşçylary geçen ýylyň dekabrynda Sankt-Peterburgda GDA döwletleriniň Baştutanlarynyň resmi däl sammitiniň barşynda Türkmenistanyň we Özbegistan Respublikasynyň Prezidentleriniň gazanan ylalaşyklarynyň çäginde ikitaraplaýyn gatnaşyklary ösdürmegiň mümkinçiliklerini maslahatlaşdylar.
