Türkmenistanyň Prezidenti Gurbanguly Berdimuhamedow ýakynda Eýran Yslam Respublikasynda saparda bolar. Bu baradaky meselä türkmen Lideriniň tabşyrygy boýunça Eýranda saparda bolýan Türkmenistanyň wekiliýetiniň ýolbaşçysy Serdar Berdimuhamedowyň 8-nji ýanwarda Eýranyň daşary işler ministri Hosseýn Amir Abdollahiýan bilen geçiren duşuşygynda üns çekildi.
Eýranyň daşary syýasat edarasynyň mfa.gov.ir saýtynda habar berlişi ýaly, duşuşygyň dowamynda taraplar ykdysadyýet, söwda, energetika, ulag-aragatnaşyk we ýükleri daşamak ulgamyndaky bilelikdäki hyzmatdaşlygy ara alyp maslahatlaşdylar. Duşuşykda Prezident Gurbanguly Berdimuhamedowyň ýakyn wagtda Eýran Yslam Respublikasynda saparda boljakdygyna üns çekilip, onuň çäklerinde gol çekilmeli ikitaraplaýyn resminamalar barada pikir alşyldy.
Wise-premýer Serdar Berdimuhamedow we Eýranyň daşary işler ministri Hosseýn Amir Abdollahiýan sebit meseleleri, şol sanda Owganystandaky çylşyrymly ýagdaýlar barada durup geçip, bu ýurtda asuda we parahat durmuşyň tiz wagtda ýola goýuljakdygyna ynam bildirdiler.
