Türkmenistanyň Prezidenti Gurbanguly Berdimuhamedow ýurtda koronawirus pandemiýasyna garşy üstünlikli göreşmekde aýgytlaýjy ädimleriň biriniň hem rus önümçiligindäki sanjymlardygyny belledi.
"Biz Russiýa Federasiýasyna örän minnetdardyrys. Türkmenistanda bu günki güne çenli bu pandemiýa hasaba alynmady. Munda Russiýa Federasiýasynyň ýardamy uludyr. Biz ilkinjileriň biri bolup «Sputnik V» we «Epiwakkorona» sanjymlaryny hasaba aldyk. Bu günki gün ilatymyz «Sputnik V» we «Epiwakkorona» bilen sanjym aldy. Ýakyn günlerde bolsa «Sputnik Laýt» sanjymynyň hem tapgyryny aldyk, ol buster sanjymy hökmünde ulanylýar» — diýip, TASS türkmen Lideriniň Garaşsyz Döwletleriň Arkalaşygynyň Sankt-Peterburgda geçirilen resmi däl sammitinde eden çykyşyndan getirýär.
Gurbanguly Berdimuhamedow şeýle hem bakteriologiýany we wirusologiýany öwrenmekde, koronawirus ýokanjynyň öňüni almak boýunça netijeli usulyýetleri we gollanmalary düzmekde ylmy ugurdan hyzmatdaşlygy işjeňleşdirmek barada beýan etdi.
Türkmenistan öňki sowet döwletleriniň giňişliginde koronawirus ýokanjynyň resmi taýdan hasaba alynmadyk ýeke-täk döwletidir. Pandemiýa başlany bäri, ýurtda girişe we halkara uçuşlaryna berk çäklendirmeler girizildi, şeýle hem agyz-burun örtükleri dakylyp başlandy.
Iýul aýynyň başynda Türkmenistanda 18 ýaşdan uly raýatlara COVID-19-e garşy sanjym etmek kampaniýasy başlandy. Munda «Sputnik V» we «Epiwakkorona» rus sanjymlary, şeýle hem «CoronaVac» hytaý sanjymy ulanyldy.
TmCars.info-nyň habar berşi ýaly, 22-nji dekabrda geçirilen Hökümet mejlisinde Türkmenistanyň Prezidenti ýurtda koronawirus ýokanjynyň birjik-de hasaba alynmandygyny nygtap, seresaplylygy elden bermezligi hem-de köp sanly ýurtlarda COVID-19-yň täze ştammlarynyň ýüze çykmagynyň çäginde öňüni alyş çärelerini güýçlendirmegi tabşyrdy.
