Aşgabatda Türkmenistanyň Prezidenti Gurbanguly Berdimuhamedowyň we ýurdumyza döwlet sapary bilen gelen Gazagystan Respublikasynyň Prezidenti Kasym-Žomart Tokaýewiň arasynda gepleşikler geçirildi diýip, akorda.kz habar berýär.
Ýokary derejeli myhmany resmi taýdan garşylamak dabarasy Garaşsyzlyk meýdançasynda geçirildi. Bu ýerde Türkmenistanyň hem-de Gazagystanyň döwlet senalary ýaňlandy. Soňra Prezidentler Gurbanguly Berdimuhamedow we Kasym-Žomart Tokaýew hormat garawulynyň hatarlaryndan geçip, birek-birege resmi wekiliýetleriň agzalaryny tanyşdyrdylar.
Dabara tamamlanandan soň, ikiçäk görnüşde duşuşyklar geçirildi. Söhbetdeşler dostlukly, ynanyşmak ýagdaýynda geçen gepleşikleriň barşynda iki ýurduň eýe bolan mümkinçilikleriniň hem-de durmuş-ykdysady taýdan ösüşiniň esasy ugurlaryny nazara almak bilen, ýola goýlan netijeli hyzmatdaşlygy has-da giňeltmäge ygrarlydyklaryny tassykladylar.
Şeýle hem taraplar ählumumy we sebit gün tertibiniň meselelerini maslahatlaşdylar.
Gazagystanyň Prezidenti türkmen kärdeşine Türkmenistana döwlet sapary bilen gelmäge çakylygy üçin minnetdarlyk bildirdi.
