Türkmenistanyň Prezidentiniň Permany bilen Türkmenistanyň Ministrler Kabinetiniň ýanynda Ulag we kommunikasiýalar agentligi döredilip, onuň başlygy wezipesine Mämmethan Çakyýew bellenildi.
2021-nji ýylyň alty aýynyň jemlerine bagyşlanyp geçirilen giňişleýin Hökümet mejlisinde habar berlişi ýaly, "Türkmendemirýollary", "Türkmenaragatnaşyk", "Türkmenawtoulaglary", "Türkmenhowaýollary", "Türkmendeňizderýaýollary" agentlikleri täze döredilen Ulag we kommunikasiýalar agentliginiň garamagyna berildi.
Ministrler Kabinetiniň ýanyndaky ulag we kommunikasiýalar agentligine Adalat ministrligi we beýleki degişli ministrlikler bilen bilelikde Ministrler Kabinetiniň ýanyndaky ulag we kommunikasiýalar agentligi hakyndaky Düzgünnamanyň, Agentligiň merkezi edarasynyň gurluşynyň taslamalaryny hem-de karardan gelip çykýan üýtgetmeleri we goşmaçalary Türkmenistanyň kanunçylygyna girizmek baradaky teklipleri bir aý möhletde taýýarlamak hem-de Ministrler Kabinetine bermek tabşyryldy.
