8-nji iýulda Türkmenistanyň daşary syýasat edarasynyň binasynda wideoaragatnaşyk görnüşinde Türkmenistanyň we Marokkonyň Daşary işler ministrlikleriniň arasynda syýasy geňeşmeler geçirildi, oňa Marokko Patyşalygynyň daşary işler ministri Naser Burit gatnaşdy. Bu barada TDIM-niň Metbugat gullugy habar berýär.
Geňeşmeleriň barşynda türkmen Lideriniň Afrika yklymynyň ýurtlary bilen netijeli gatnaşyklary giňeltmegiň zerurdygy baradaky tabşyryklaryna laýyklykda, geçen ýylyň ýazynda türkmen wekiliýetiniň Marokko Patyşalygyna amala aşyran saparynyň netijeli häsiýete eýe bolandygy nygtaldy. Taraplar syýasy-diplomatik, söwda-ykdysady we medeni-ynsanperwer ulgamlarynda ikitaraplaýyn hyzmatdaşlyk meseleleriniň giň toplumyny ara alyp maslahatlaşdylar.
Daşary syýasat, ulag, bilim, ylym we beýleki ulgamlarda goşmaça resminamalary işläp taýýarlamak üçin gepleşikleri işjeňleşdirmek barada ylalaşyp, taraplar iki ýurduň söwda-ykdysady gatnaşyklary ösdürmäge gyzyklanmalaryny beýan etdiler.
Geňeşmeleriň jemleri boýunça «Türkmenistanyň Daşary işler ministrligi bilen Marokko Patyşalygynyň Daşary işler, Afrika hyzmatdaşlygy we marokkoly ekspatriatlar boýunça ministrliginiň arasynda 2022-2023-nji ýyllar üçin hyzmatdaşlyk etmegiň Maksatnamasyna» gol çekildi.
