Türkmenistanda ýakyn günlerde howanyň çendenaşa gyzmagyna garaşylýar. Bu barada Oba hojalyk we daşky gurşawy goramak ministri Hökümet mejlisiniň barşynda döwlet Baştutanyna habar berdi.
Türkmen Lideri günüň aşa gyzmagynyň we yssy günlerde günüň aşagynda gezmegiň adamlaryň saglygyna ýaramaz täsiriniň bardygyna ünsi çekip, howanyň ýagdaýy baradaky maglumatlary metbugatda hem-de teleradioýaýlymlarda yzygiderli berilmelidigini belledi.
Ministrler Kabinetiniň agzalary, pudaklaryň we edara-kärhanalaryň ýolbaşçylary hem-de raýatlar günüň örän gyzýan wagtlary onuň şöhlesinden goranmak üçin zerur çäreleri görmelidirler diýip, döwlet Baştutany aýtdy.
Türkmen Lideri zerur bolmasa, günüň aşagynda gezmeli däldigini belledi we kiçi ýaşly çagalaryň günüň aşagynda bolýan wagtyny çäklendirip, olaryň gündiz daşarda, açyk howada gezmegine berk gözegçilik etmegiň wajypdygyny nygtady.
Ýangyn howpsuzlyk kadalarynyň dogry we berk berjaý edilmegine gözegçiligi güýçlendirmek, şunuň bilen baglylykda, ähli ýerde elektrik enjamlaryny aýawly peýdalanmak wajypdyr. Şu kadalary dogry we berk berjaý etsek, biz günüň aşa gyzmagyndan goranyp bileris diýip, Gurbanguly Berdimuhamedow belledi.
Şeýle hem okap bilersiňiz:
