Şu günler howanyň aşa gyzmagy saglyk ýagdaýymyza has ünsli bolmagy talap edýär. Şonuň üçin hem lukmanlar jöwzaly tomusda şu aşakdaky kadalary hökman berjaý etmegi maslahat berýärler:
- Yssy howada ýeňil, rahat, arassa nah matadan tikilen açyk reňkli egin-eşikleri geýmeli
- Günden goranmak üçin kelläňize ýeňiljek başgap geýiň, ýaglyk dakynyň ýa-da saýawan göteriň!
- Zerurlyk ýüze çykmasa, Gün şöhlesiniň ýiti düşýän wagtlarynda, ýagny 11.00-dan 17.00-a çenli aralykda daşaryk çykmaly däl.
- Günden goraýjy äýnekleri dakmak peýdaly.
- Tomsuň yssy howasynda açyk meýdanlara gezelenç etmek maslahat berilmeýär.
- Howanyň aşa gyzmagy bilen bedenden köp mukdarda suwuklygyň der üsti bilen bölünip çykmagy diňe bir bedeniň deňagramlylygyny bozman, eýsem, ganyň goýulaşmagyna getirýär. Şonuň üçin hem yssy howalarda günüň dowamynda 2,5-3 litre golaý suw içmeli.
- Gazlandyrylan içgilerden, agyr, ýagly naharlary iýmekden ýüz öwrüň!
- Tomsuň jöwzaly yssy günlerinde, esasanam, gartaşan adamlar we 2 ýaşa çenli çagalar bilen daşary çykylanda seresap bolmaly.
- Yssy howada gyzyp gelip sowuk suwa düşmek, sowadyjynyň öňünde durmak, buz ýaly sowuk içgileri içmek düýbünden gadagan. Şeýle-de daşary çykylanda dürli ýokanç kesellerden goranmak üçin agyz-burun örtüklerini dakynyň!
- Jemgyýetçilik ýerlerinde 2 metr howpsuz araçägi saklaň! Şahsy arassaçylyk düzgünlerini berjaý etmek bolsa, saglygymyzyň kepilidir.
