Amerikan sungat ussady Jessika Linniň ýolbaşçylygyndaky kantri rok žanrynda çykyş edýän aýdym-saz topary 2025-nji ýylyň 2-7-nji iýuly aralygynda Türkmenistana sapar bilen geler.
ABŞ-nyň Türkmenistandaky ilçihanasynyň habar bermegine görä, saparyň dowamynda Aşgabatda konsert bilen çykyş eder.
Toparyň ilkinji konserti 5-nji iýulda sagat 19:00-da Aşgabadyň “Türkmenistan” kinokonsert zalynda bolar.
Ikinji çykyş bolsa 6-njy iýulda sagat 19:30-da “Arkaç” söwda-dynç alyş merkezinde geçiriler.
Konsertlere giriş hemmeler üçin mugt bolup, zallar tomaşaçylaryň geliş nobatyna görä doldurylar.
Amerikan toparynyň saparynyň çäginde olaryň türkmen kärdeşleri bilen duşuşyklary hem-de bilelikdäki döredijilik çykyşlary meýilleşdirilýär.
Jessika Linn döredijilik ýoluna ýetginjek ýaşynda Manhettende döredilen topary bilen başlady. 2014-nji ýyldan bäri birnäçe EP we ýekelikdäki aýdymlary çykardy we olar bilen ABŞ-nyň, Angliýanyň, Awstriýanyň, Italiýanyň we Kanadanyň aýdym-saz sanawlaryna girmegi başardy. Ol Kit Urban, Klint Blek, ZZ Top we Loretta Linn ýaly meşhur ýerine ýetirijiler bilen bile Ýewropada we halkara festiwallarda çykyş etdi.
Pandemiýa döwründe Jessika onlaýn konsertleriň tapgyryny gurnap, Pollstar çartlaryna girmegi başardy. 2020-nji ýylda bolsa ol “American Music Abroad” programmasy boýunça ABŞ-nyň medeni diplomatiýasynyň ilçisi boldy.
Onuň ilkinji “Lone Rider” atly albomy ABŞ-da we Angliýada Amazon hem-de iTunes çartlarynda öňdäki orunlara çykdy.
