Donald Tramp TikTok üçin mümkin bolan alyjynyň – «örän baý adamlardan ybarat toparyň» bardygyny aýtdy. Onuň sözlerine görä, bu geleşigiň amala aşmagy üçin Hytaýyň Başlygy Si Szinpiniň razyçylygy gerek bolar diýip, Reuters agentligi habar berýär.
«Ýeri gelende aýtsak, TikTok üçin alyjymyz bar. Meniň pikirimçe, bize Hytaýyň rugsady gerek bolar. Prezident Si muňa razyçylyk berer öýdýän» — diýip, Tramp «Fox News» teleýaýlymynda Mariýa Bartiromo bilen «Sunday Morning Futures» gepleşiginde aýtdy.
Tramp başga maglumat bermän, maýadarlary atlandyrmakdan saklandy, olaryň kimdigini «takmynan, iki hepdäniň dowamynda» mälim etjekdigini wada berdi.
2024-nji ýylyň ýazynda ABŞ-nyň Wekiller palatasy TikTok-nyň Hytaýyň ByteDance kompaniýasynyň gözegçiliginden çykmadyk ýagdaýynda, platformanyň ýurduň çäginde gadagan edilmegini göz öňünde tutýan kanuny kabul etdi. Kanunçykaryjylar bu sosial toruň ýurduň milli howpsuzlygyna howp salýandygyny aýdyp, Hytaýyň hökümetiniň amerikaly ulanyjylaryň şahsy maglumatlaryna elýeterliliginiň bardygyny öňe sürýärler.
TikTok-nyň amerikan bölüminiň satylmaly möhleti ilki bilen 2025-nji ýylyň 19-njy ýanwaryna çenli – Trampyň kasam kabul edişinden bir gün öň diýlip bellenipdi. Ol wezipesinde girişensoň bu möhleti ilki bilen 5-nji aprele çenli, soň bolsa ýene 75 gün uzaltdy.
«Biz TikTok-yň garaňkylyga düşmegini islämzok. Ylalaşygy jemlemek üçin, TikTok we Hytaý bilen hyzmatdaşlyga sabyrsyzlyk bilen garaşýarys» — diýip, Tramp ýazdy.
