2-nji iýulda Prezident Serdar Berdimuhamedow Döwlet howpsuzlyk geňeşiniň nobatdaky mejlisini geçirdi. Onda ýurdumyzyň harby we hukuk goraýjy edaralaryň şu ýylyň alty aýynda ýerine ýetiren işleriniň netijelerine garaldy diýip, “Watan” habarlar gepleşiginde habar berildi.
Mejlisiň başynda Döwlet howpsuzlyk geňeşiniň sekretary, goranmak ministri B.Gündogdyýew harby gulluga çagyrmak çäresiniň netijeleri hem-de harby gullukçylarynyň gulluk we ýaşaýyş şertlerini gowulandyrmak boýunça alnyp barylýan işler barada aýtdy.
Döwlet Baştutany ýurdumyzyň Garaşsyzlygynyň 34 ýyllyk baýramy mynasybetli geçiriljek dabaraly harby ýörişe häzirden başlap, gowy taýýarlyk görmegiň möhümdigini belledi we Döwlet howpsuzlyk geňeşiniň sekretary, goranmak ministrine dabaraly harby ýörişi ýokary derejede geçirmek üçin zerur çäreleri görmegi tabşyrdy.
Baş prokuror B.Muhamedow hukuk bozulmalaryna getirýän sebäpleri öz wagtynda aradan aýyrmak maksady bilen görlen anyk çäreler, sanly ulgamy ornaşdyrmak we işgärleriň hünär derejesini ýokarlandyrmak boýunça ýerine ýetirilen işler barada aýtdy.
Içeri işler ministri M.Hydyrow ýurdumyzda jemgyýetçilik tertibini saklamak, paýtagtymyzyň hem-de welaýatlaryň ýollarynda ýol-ulag hadysalarynyň öňüni almak boýunça görlen çäreler barada hasabat berdi. Bellenilişi ýaly, ilatyň arasynda, edaralarda we guramalarda ýangyn howpsuzlygynyň talaplaryny berjaý etmek boýunça düşündiriş işleriniň geçirilişine uly üns berilýär.
Ýokary kazyýetiň başlygy B.Hojamgulyýew sanly ulgamyň mümkinçiliklerini işjeň ulanmak arkaly kazyýet işini kämilleşdirmek hem-de işgärleriň hünär derejesini ýokarlandyrmak boýunça görlen çäreler barada hasabat berdi.
Döwlet serhet gullugynyň başlygy Ý.Nuryýew mukaddes serhetlerini goramak, serhet galalaryny döwrebaplaşdyrmak, olaryň maddy-enjamlaýyn binýadyny pugtalandyrmaknaýyruhunda terbiýelenmegi üçin zerur şertleri döretmek boýunça görlen çäreler barada hasabat berdi.
Döwlet gümrük gullugynyň başlygy M.Hudaýkulyýew gullugyň üstüne ýüklenen wezipeleri ýerine ýetirmekde döwrebap iş usullaryny hem-de iň täze tehnologiýalary işjeň ulanmak boýunça görülýän çäreler, şeýle hem harby gullukçylaryň hünär derejesini ýokarlandyrmak boýunça geçirilýän işler barada hasabat berdi.
Döwlet migrasiýa gullugynyň başlygy A.Sazakow şeýle hem gullugyň maddy-enjamlaýyn binýadyny pugtalandyrmak, ýurdumyzyň Ýaragly Güýçleriniň Belent Serkerdebaşysynyň ozal beren tabşyryklaryny ýerine ýetirmek boýunça görlen çäreler, degişli ösüş Maksatnamasynyň durmuşa geçirilişi barada hasabat berdi.
