Arnold Şwarseneggeriň iň girdejili filmi — Denni Dewito bilen bilelikde düşen “Ekizler” komediýasy bolup çykdy. Bu barada ol Watch What Happens Live atly şüweleň gepleşiginde Endi Koene beren interwýusynda gürrüň berdi diýip, Variety ýazýar.
“Terminator” («Терминатор»), “Awçy” («Хищник») ýa-da “Ähli zady ýatla” («Вспомнить всё») ýaly meşhur söweşjeň filmlerde düşendigi bilen tanalsa-da, iň uly girdejini aktýora hut komediýa filmi getirdi.
"Birinji orunda “Ekizler” durýar, sebäbi biz şol film üçin gonorar almadyk, onuň ýerine filmdäki hukuklardan paý aldyk. Bu ajaýyp strategiýa boldy. Biz ol filmden gaty gowy gazandyk — diýip, Şwarsenegger aýtdy. Onuň sözlerine görä, gazanan girdejisi 40 million dollardan geçdi, hatda ondan hem köp boldy: — Hatda meniň başga islendik filmimden has kän — diýip belledi.
Ogly Patrik bilen geçiren söhbetdeşliginde Şwarsenegger bu komediýanyň üstünlik gazanjakdygyna ilkinji başda hiç kimiň ynanmandygyny ýatlaýar:
— Prodýuserler meni komediýa filmi üçin näme üçin saýlasynlar? Maňa akylyndan azaşan diýýärdiler… Aýwan Raýtman bilen Denni Dewito peýda bolýança şeýle boldy.
Aktýor şeýle şert hödürläpdir: 16,5 million dollarlyk býujetli filmiň girdejisinden 40% paý almak şerti bilen hiç hili gonorar almajakdyklaryny aýdypdyr. Netijede film kinoteatrlarda 216 million dollar girdeji gazandy, wideo görnüşinde satuwdan hem has köp girdeji getiripdir.
Soňra bu filme dowam hökmünde “Üçemler” («Тройняшки») atly sikwel düşürmek hem meýilleşdirilipdi. Bu gezek aktýorlar toparyna Eddi Merfi goşulmalydy. Ýöne režissýor Aýwan Raýtman aradan çykandan soň bu taslama ýatyryldy.
