Hytaý hökümeti ýerli prokatda golliwud filmleriniň sanyny azaltmak kararyna geldi. Munuň sebäbi ABŞ tarapyndan hytaý harytlaryna girizilen gümrük paçlary boldy diýip, Deadline habar berýär.
“ABŞ-nyň hökümetiniň HHR-e gatnaşykda gümrük paçlaryndan hyýanatçylykly peýdalanmak boýunça ýalňyş tejribesi hytaý auditoriýasynyň amerikan filmlerine bolan isleginiň barha peselmegine getirer. [...] Biz daşarky dünýä üçin açyk bolmagyň ýokary derejesini saklaýarys we bazaryň islegini kanagatlandyrmak üçin dünýäniň köp ýurtlaryndan birinji derejeli filmleri görkezeris” – diýlip, HHR-iň Kinematografiýa işleri boýunça Döwlet edarasynyň beýanynda aýdylýar.
Bu çäklendirmä jogap hökmünde ABŞ-nyň Prezidenti Donald Tramp “mundan has erbet zatlary hem eşidendigini” aýtdy.
Hytaý dünýäde ululygy boýunça ikinji kino bazary bolup galýar. Häzir kinoteatrlarda “Minecraft kinoda” filmi görkezilýär. Ýazda we tomusda has uly býujetli “Missiýa ýerine ýetirmesiz 8” we “Supermen” blokbasterleriniň premýerasy meýilleşdirilýär. Häzirlikçe täze çözgüdiň olaryň prokatyna täsir etjekdigi ýa-da ýokdugy belli däl.
Ýatlap geçsek, mart aýynda Tramp Hytaý üçin 20% gümrük pajyny kesgitledi. Ol 2-nji aprelde hytaý harytlaryna gatnaşykda 34% nyrh girizdi. Pekin hem şonuň bilen jogap berdi. Soňra taraplar ikitaraplaýyn gümrük paçlaryny gezekli-gezegine ýokarlandyrmagy dowam etdirdi we birnäçe günüň içinde olary 125%-e ýetirdi.
