Apple 2021-nji ýylda diňe iPhone-yň üsti bilen Microsoft-dan köp girdeji gazandy

Apple 2021-nji ýylda diňe iPhone-yň üsti bilen Microsoft-dan köp girdeji gazandy

Dogry 15 ýyl mundan ozal, 2007-nji ýylyň 29-njy iýunynda ABŞ-da birinji nesliň iPhone smartfonlarynyň satuwy başlandy. Bu gurluş Apple kompaniýasynyň taryhynda iň girdejili önüm boldy. Diňe 2021-nji ýylda ol kompaniýa Microsoft ýa-da General Motors ýaly dünýäniň uly kompaniýalarynyň girdejisinden köp girdeji getirdi diýip, 3dnews.ru belleýär.

“Kommersantyň” Germaniýanyň “Statista” statistika serwisiniň maglumatlaryna salgylanyp habar bermegine görä, 2021-nji ýylyň jemi boýunça iPhone satuwy 191,9 mlrd dollara ýetdi. Apple-iň diňe bir önüminden gazanan girdejisi uly kompaniýalaryň girdejilerinden ýokary boldy. 2021-nji maliýe ýylynda kompaniýanyň umumy girdejisi 365 mlrd dollara barabar boldy.

Häzirki wagta çenli dünýäniň smartfon bazarynda iPhone-yň paýy 17,4%-e deňdi, bu dünýäde her bäşinji smartfony diýen ýaly Apple-iň öndürýändigini aňladýar. 15 ýylyň dowamynda kompaniýa 2 milliarddan gowrak iPhone satdy, olaryň umumy bahasy 1,5 trln dollardan geçdi.