Lukmanlar öýken rak keseliniň seýrek alamatyny anykladylar

Lukmanlar öýken rak keseliniň seýrek alamatyny anykladylar

Dowamly daban agyrysynyň öýken rak keseliniň ýeke-täk alamatydygyny görkezýän ýagdaý ýüze çykdy. Bu barada Beýik Britaniýanyň Milli lukmançylyk ulgamy (NHS) habar berdi. Muny “Daily Express” neşirine salgylanyp, lenta.ru ýetirýär.

Ýagny, gürrüň singapurly 47 ýaşly hassa barada gidýär. Şu ýylyň mart aýynda onda onkologiýa keseli sebäpli dörän we aýaga geçen gan lagtasy ýüze çykaryldy. Ýöne bu adam daban agyrysyndan başga, öýken rak keseli üçin has häsiýetli bolan agyry, üsgülewük, dem gysma, gan gusma we düşnüksiz ýadawlyk ýaly alamatlardan ejir çekmändi.

Lukmançylyk tejribesinde şeýle ýagdaýlaryň örän seýrek duşýandygyna garamazdan, lukmanlar olary äsgermezlik etmezligi maslahat berýärler. Olar eger aýakdaky agyry ýeterlik derejede güýçli bolsa ýa-da iki hepdäniň dowamynda aýrylmasa, onda alada edip başlamagyň wagtydygyny belleýärler. Şeýle-de, lukmanlar süýji keselli adamlaryň dabanyň ýagdaýyna aýratyn üns bermelidigini ýatladýarlar.