CNPC «Galkynyş» känindäki täze guýulary burawlany üçin 51 mlrd kub metr gaz alar

CNPC «Galkynyş» känindäki täze guýulary burawlany üçin 51 mlrd kub metr gaz alar

Hytaýyň CNPC Döwlet energetiki kompaniýasy «Galkynyş» gaz käninde gazyň çykarylyşyny artdyrandygy üçin töleg hökmünde 51 mlrd kub metre çenli türkmen gazyny alar. Bu barada Reuters agentligi duşenbe güni habar berdi.

Düýn taslamany işe girizmek dabarasy geçirildi. Tmcars.info-nyň öň habar berşi ýaly, «Galkynyş» gaz känindäki täze guýularyň gurluşygyny tamamlamak hakynda türkmen Lideri şu ýylyň 16-njy iýulynda geçirilen Ministrler Kabinetiniň sanly ulgam arkaly nobatdaky mejlisinde degişli Karara gol çekipdi.

Resminama laýyklykda, “Türkmengaz” döwlet konsernine Türkmenistanyň Prezidentiniň 2009-njy ýylyň 29-njy dekabrynda çykaran 10747-nji Kararyna laýyklykda, Birleşen Arap Emirlikleriniň “Gulf Oil & Gas FZE” kompaniýasy bilen baglaşan şertnamasy boýunça gurluşyk işlerine başlanyp, doly tamamlanmadyk 3 sany gaz guýusynyň gurluşygyny tamamlamak we olary önümçilige girizmek barada Hytaý Halk Respublikasynyň “СNPС Сhuanqing Drilling Engineering Сompany Limited” kompaniýasy bilen şertnamany işleri 30 aýyň dowamynda ýerine ýetirmek şertinde baglaşmaga ygtyýar berildi.

Taslamany 30 aýyň dowamynda amala aşyrmak göz öňünde tutulýar. Garaşylyşy ýaly, her guýudan, ortaça, her günde 3 million kub metr gaz çykarylar.

Öň baglaşylan ylalaşyklara laýyklykda, hyzmatlaryň ýerine ýetirilmegi üçin töleg hökmünde üç ýylyň dowamynda HHR-e her ýyl «mawy ýangyjyň» 17 mlrd kub metri iberiler.