ABŞ-nyň Federal raýat awiasiýasy dolanyşygy Otto Aerospace kompaniýasynyň üýtgeşik «Phantom 3500» biznes-jeti üçin güwänama talaplaryny kesgitledi. Uçaryň ýolagçylar üçin adaty penjireleri bolmaz. Deregine onuň içine daşarky kameralardan gelýän şekilleri görkezýän ekranlar oturdylar.
Önüm öndürijileriň aýtmagyna görä, penjireleriň aýrylmagy howa akymyny gowulandyrmak üçindir we uçaryň göwresiniň tekiz bolmagy howanyň onuň üstünden bökdençsiz akyp geçmegine we ol tarapdan garşylygyň azalmagyna ýardam etmelidir.
Kompaniýa meňzeş klasdaky häzirki zaman biznes-jetleri bilen deňeşdirilende ýangyç sarp edilişini 61% azaltmagy göz öňünde tutýar. Bu görkezijiler entek synagaryň dowamynda tassyklanmaly bolar. Güwänama üçin arza 2025-nji ýylyň sentýabrynda gowşuryldy.
«Phantom 3500» uçarynyň ilkinji uçuşy 2027-nji ýyla, ulanyşa berilmegi bolsa 2030-njy ýyla meýilleşdirilýär. Taslamanyň iň iri sargytçysy 5 milliard dollardan gowrak baha bilen 300 sany uçar satyn almak meýilnamasyny yglan eden Flexjet kompaniýasy boldy.
Häzirki wagtda önüm öndürijiler materiallary synagdan geçirmegi we uçuş maksatnamasyna taýýarlygy dowam etdirýärler.
