Türkmenistanyň Oguz han adyndaky Inžener-tehnologiýalar uniwersitetinde Ylymlar güni mynasybetli «Berkarar döwletiň täze eýýamynyň Galkynyşy döwründe ylym, tehnika we innowasion tehnologiýalar» ady bilen utgaşykly görnüşde geçirilýän iki günlük halkara ylmy maslahat öz işine başlady. Bu çäre sanly tehnologiýalara we innowasiýalara esaslanýan ylmy gözlegler bilen tanyşmaga hem-de halkara hyzmatdaşlygy ilerletmäge şert döredýär.
Ýurtda milli ykdysadyýetiň ähli pudaklaryna, aýratyn-da, ýangyç-energetika, gurluşyk we dokma senagatyna ylmyň soňky gazananlaryny ornaşdyrmak, çig maly gaýtadan işlemegiň netijeliligini hem-de önümleriň bäsdeşlige ukyplylygyny ýokarlandyrmak wajyp wezipeleriň hatarynda durýar. Şunda Türkmenistanyň ýokary okuw mekdepleriniň we ylmy-barlag institutlarynyň daşary ýurtlaryň öňdebaryjy uniwersitetleri hem-de tehnologik merkezleri bilen tejribe alyşmagy uly ähmiýete eýedir.
Iki günlük forumyň öňüsyrasynda gatnaşyjylar ýurduň ylym-bilim ulgamynda ýetilen sepgitleri görkezýän innowasion tehnologiýalaryň sergisi bilen tanyşdy. Umumy mejlisiň başynda Türkmenistanyň Prezidentiniň maslahata gatnaşyjylara iberen Gutlagy okaldy.
Maslahatda Azerbaýjanyň, Russiýanyň, Hytaýyň, Italiýanyň, Günorta Koreýanyň, Türkiýäniň, Müsüriň, Özbegistanyň, Belarusyň we Tatarystanyň Ylymlar akademiýalarynyň hem-de uniwersitetleriniň ýolbaşçylary we wekilleri çykyş edip, öz alyp barýan ylmy işleri barada gürrüň berdi.
Çykyşlarda türkmen-azerbaýjan medeni-ynsanperwer gatnaşyklary, Nyzamy Genjewiniň we Magtymguly Pyragynyň edebi mirasyny öwrenmek işleri, şeýle-de himiýa, oba hojalygy, seýsmologiýa we ekologiýa ugurlary boýunça türkmen-özbek, türkmen-belarus we türkmen-rus ylmy hyzmatdaşlygynyň möhüm orny barada bellenildi.
Şeýle-de, sebitiň biodürlüligini gorap saklamak, innowasion derman serişdelerini öndürmek hem-de seýrek taryhy çeşmeleri sanly ulgama geçirmek boýunça TÜRKTAV gaznasynyň alyp barýan işlerine aýratyn üns çekildi.
Günüň ikinji ýarymynda maslahata gatnaşyjylar Ylymlar güni mynasybetli guralan baýramçylyk konsertiniň hem-de ýaşlaryň arasyndaky ylmy işler boýunça bäsleşigiň ýeňijilerini sylaglamak dabarasynyň hormatly myhmanlary boldy.
13-nji iýunda halkara ylmy maslahat öz işini ýurduň ýokary okuw mekdeplerinde hem-de TYA-nyň Halkara ylmy-tehnologiýa parkynda birnäçe bölümçelerde dowam eder.
Mundan başga-da, daşary ýurtly myhmanlar üçin Aşgabadyň muzeýleri bilen tanyşlygy öz içine alýan medeni maksatnama hem-de ýurduň alymlary, professor-mugallymlary we talyplary bilen duşuşyklar meýilleşdirilýär.
