Aşgabatda Azerbaýjan Respublikasynyň medeniýet günleriniň çäginde «Tagiýew. Nebit» çeper filminiň ilkinji görkezilişi boldy. Kinofilm «Aşgabat» kinoteatrynda köpçülige hödürlendi we iki ýurduň arasyndaky medeni alyş-çalyşygyň taryhynda ähmiýetli waka öwrüldi.
Bu taryhy drama Azerbaýjanyň adyndan «Iň gowy halkara film» ugry boýunça «Oskar» baýragyna dalaşgär görkezilipdi.
Kino meşhur senagatçy, millioner we haýyr-sahawatçy Hajy Zeýnalabdin Tagiýewiň durmuşy baradaky dört bölümli saganyň ilkinji bölegidir. Taslama onuň aradan çykan gününiň 100 ýyllygyna bagyşlanyp döredildi hem-de ädikçiniň maşgalasynda dünýä inip, soňra öz döwrüniň iň iri telekeçileriniň birine öwrülen şahsyýetiň durmuş ýoluny gürrüň berýär.
Filmdäki wakalar XIX asyryň ahyrynda — XX asyryň başlarynda bolup geçýär. Eseriň awtorlary Tagiýewiň nebit senagatynyň ösmegine, Baku şäheriniň abadanlaşdyrylmagyna goşan uly goşantlary, şeýle hem onuň magaryfçylyk işleri barada gürrüň berýär. Filmde, aýratyn-da, musulman Gündogarynda gyzlar üçin niýetlenen ilkinji dünýewi mekdebiň açylyşy aýdyň şöhlelendirilýär.
Filmiň režissýory Zaur Gasymly, baş prodýuseri bolsa Azerbaýjanyň Prezidenti Ylham Alyýewiň gyzy Arzu Alyýewadyr.
Kino eseri Geýdar Aliýew adyndaky Gaznanyň, Medeniýet ministrliginiň we Azerbaýjanyň Kino agentliginiň goldamagynda Baku Media Merkezi tarapyndan surata düşürildi.
