Fransiýada milli ätiýaçlandyryş maksatnamasynyň çäklerinde, 2026-njy ýylyň iýun aýynyň ortalaryndan başlap, semizligi bejermek üçin niýetlenen derman serişdelerini satyn almagyň çykdajylary döwlet tarapyndan maliýeleşdirilip başlanar.
Bu barada ýurduň saglygy goraýyş ministri Stefani Risteniň sözlerine salgylanýan Le Monde neşiri habar berýär.
Şeýlelikde degişli kesel babatda lukmançylyk görkezmeleri bolan Fransiýanyň raýatlary uly isleg bildirilýän bu dermanlary dolulygyna döwletiň hasabyna satyn alyp bilerler.
Täze karar «Wegovy» we «Mounjaro» ýaly dünýä belli dermanlary öz içine alar.
Ätiýaçlandyryş arkaly puly yzyna almak hukugyndan goşmaça keselleri bolmadyk, şol bir wagtda aýdyň ýüze çykan semizlikden ejir çekýän näsaglar, şeýle hem semizligiň agyr görnüşi bolan we munuň ýany bilen beýleki dowamly keselleri hem ýüze çykan raýatlar peýdalanyp bilerler.
Saglygy goraýyş ministri Stefani Ristiň aýtmagyna görä, bu başlangyç milli saglyk ätiýaçlandyryş ulgamyndan her ýyl takmynan 100 million ýewro möçberinde serişde talap eder.
Ministrligiň ýolbaşçysy bu çözgüdiň sebit üçin ähmiýeti barada aýratyn durup geçdi we şeýle diýdi:
— Fransiýa mätäç näsaglara adaty lukmançylyk kömeginiň çäklerinde we hemişelik ýagdaýda derman çykdajylarynyň öwezini dolmagy hödürlejek Ýewropa Bileleşigindäki ilkinji ýurt bolar.
Şunlukda, görkezilen möhletden başlap, aşa semizlige garşy bejergi resmi taýdan Fransiýanyň meýilleşdirilen lukmançylyk ulgamyna doly birleşdiriler.
