Özbegistanyň Namangan şäherinde geçirilen 65-nji halkara gül festiwaly, onuň guralmagy üçin bir aýyň dowamynda 29,4 milliondan gowrak ösümlik oturdylandan soň, Ginnesiň rekordlar kitabyna girdi.
Guinness World Records guramasynyň iň pes talaby 1 million gül oturtmakdan ybaratdy, ýöne Namangan oblastynda jemi 29 406 384 sany ösümlik ekildi. Ösümlikleri oturtma wagtynda tehnikalaryň ulanylmagyna rugsat berilmedi, ähli işler diňe elde ýerine ýetirildi.
«Gowy utgaşdyrylan guramaçylyk we umumy maksat arkaly Namangan şäheri gülleriň, agzybirligiň we kämilligiň nyşany bolan ajaýyp bir ýere öwrüldi» – diýip, Ginnesiň rekordlar kitabynyň resmi emini Şeýda Subaşi belledi.
Bu festiwal Namanganda 1961-nji ýyldan bäri geçirilip gelinýär, 2018-nji ýylda bolsa oňa halkara statusy berildi.
Gül baýramçylygy 24-nji maýdan 12-nji iýula çenli dowam eder. Festiwalyň maksatnamasy 150-ä golaý çäräni — ylmy maslahatlary, forumlary, ýarmarkalary, konsertleri we dron şüweleňlerini öz içine alýar.
Festiwalyň açylyş dabarasy güller bilen bezelen awtomobilleriň ýörişi bilen utgaşdyryldy. Bu ýörişe retro we döwrebap ulaglar gatnaşdy, şeýle hem wokal we tans toparlarynyň çykyşlary guraldy.
