Finlýandiýanyň «Visit Finland» syýahatçylyk guramasy fin aşhanasyny dünýä meşhur etmek maksady bilen, şu ýylyň güýzünde 16 sany daşary ýurtly myhman üçin çykdajylary doly tölenen tagam syýahatyny guraýar diýip, Euronews habar berýär.
Täsin syýahat üçin saýlanyp alnan 16 adam iki topara bölünip, birinji bölek Finlýandiýanyň Kenarýaka we arhipelag sebitine we ikinjisi bolsa Laplandiyanyň ýabany tebigatyna ugradylar.
Birinji topar üçin ýörite tagam meýilnamasyny meşhur aşpez Erik Mansikka taýýarlar. Onuň Turku şäherindäki «Kaskis» restorany 2022-nji ýylda paýtagt Helsinki şäheriniň daşynda bütindünýä «Michelin» ýyldyzyny we ekologiýa durnuklylygy üçin «Ýaşyl ýyldyzyny» alan ilkinji restorandyr.
Ikinji topar üçin aşpez Joel Manninen yhlas eder. Ol 2025-nji ýylda Finlýandiýanyň ýaş aşpezleriniň çempionatynda ýeňiji boldy. Şu ýyl bolsa dünýäniň ýaş aşpezleriniň bäsleşiginde kümüş medaly gazandy.
Guramaçylar bu tagam meýilnamasyny düzmezden öň, ýerli ilatyň arasynda sorag-jogap geçirip, fin aşhanasyny iň gowy häsiýetlendirýän sebit tagamlaryny anykladylar. Şondan soň bolsa ady agzalan meşhur aşpezler şol maglumatlara görä ýörite meýilnamalary düzdüler.
Ýeňijiler 4 günlük we ähli çykdajylary (ýol puly, ýaşajak ýeri, iýmiti) doly ýapylan mugt syýahata eýe bolarlar. Syýahatyň dowamynda olara gyzykly gezelençler, dürli tagamlary dadyp görmek mümkinçiligi garaşýar. Şeýle-de olar syýahatyň ahyrynda aşpezleriň ýörite taýýarlan özboluşly agşam naharyna gatnaşarlar.
